माटो

माटो

माटो

मट्याङ्ग्रा बनाउन पनि काम लाग्छ

माटो भाडा बनाउन पनि काम लाग्छ

र त माटो जीवन र मरणको दोसाधमा

सधै उभिइरहन्छ 

माटोको छुट्टै अस्तित्व  छ

माटोको छुट्टै स्थायीत्व छ

त्यसैले त माटो

मुर्ति बनाउन पनि काम लाग्छ

माटोले कहिलै गरिबी उमार्दैन

अरुको पसिनाबाट सिंचित भएर

आफ्नो घमन्डका फोहोराहरु

अरुको अनुहारमा छ्यापेर

तान्डब नृत्य पनि देखाउदैन

माटोले भोक जगाउछ

तर भोकमरी छर्दैन

माटोले भोग पनि जगाउछ

तर उन्माद जन्माउदैन

त्यसैले त माटो,

माटो भएर बाच्न सकेको छ

माटो आफै कहिलै टुक्रिदैन

न कसैले टुक्र्याउन सक्छ

माटो आफै जोडिदैन

न कसैले जोड्न सक्छ

माटो तटस्थ छ

निडर छ

र स्वभिमान छ

त्यसैले त माटो

माटो भएर बाच्न सकेको छ

माटोले आफ्नै छातिमा उभिएर

आफ्नो गुणगान गाउदै

आफ्नै नाममा

सफेद कचौरा बोकेर

माग्ने हरुको भिड मन पराउदैन

र मन पराउदैन

खल्ति भित्रका चिल्साहरु

स्वेत कपडाको कफन बेरेर

खुब दानी बन्नलाई

दान पात्रमा 

सियो बनेर छिर्ने सभ्यहरुको लाम

त्यसैले त माटो

माटो भएर बाच्न सकेको छ

माटो कहिलै किनिदैन

र कसैले किन्न पनि सक्दैन

ठुलो महलको सुन्दर सो केसमा

युवतीको नरम हातहरुको

मिठो स्पर्ष खादै

गाठवाला ग्राहकको

लिलाम बढाबढमा बसेर

माटो कहिलै बेचिदैन

र कसैले बेच्न पनि सक्दैन

तर

माटो किनिएका र बेचिएका

आर्जिएका र गुमाएका

थुप्रै इतिहासहरु

टेप रेकडरको भाषा

खुब रटाइन्छ

घोकाइन्छ

र पियाईन्छ

तर मलाई यि खोक्रा ईतिहासहरु

दन्त्य कथाको राक्षसका

रगतले लतपतिएर बनेको

मधुरो आकृती जस्तै लाग्छ

माटोको आफ्नै गन्ध छ

दुर्गन्ध त नाकहरुमा  छन्

माटोमा आफ्नै सहनशिलता छ

उच्छ्रिङ्खलता त खुट्टाहरुमा छन्

माटोको पनि आफ्नै नियम छ

माटो आगो हो

र पानी पनि

माटो उर्वरा हो

र भष्म पनि

नजिस्कनु माटो सगँ

आपमान पनि नगर्नु

माटोले आफ्नो दायरामा

स्वभिमान भएर

वाच्न जानेको छ

त्यसैले त माटो,

माटो भएर बाच्न सकेको छ ॥

रुवाई

रुवाई

तिमिलाई भेट्न अाज यो एउटा बहाना हो

मलाई मात्रै हो कि यस्तो तिम्रो पनि चाहना हो

एउटा न्यानो स्पर्ष  र एक फेर मुस्कानको लोभमा

सधै तड्पिरहने लाग्छ यो मन नै दिवाना हो

फेसबुकका फोटाहरु

फेसबुकका फोटाहरु

समुन्द्र को किनार

सुकिला कपडाहरु

सलक्क  परेको शरीर

अनि गोरो अनुहार

घुडा घुडा सम्मको वान पिसमा

निलो पृष्ठभूमि पारेर

फरक फरक पोज मा

खिचिएका तस्बिर हरु

Enjoying holiday को

Caption राखेर

अपलोड गरिएकाछन फोटा हरु

Uploaded via Samsung mobile

१९ मे

२३३ likes ८४ comments

मलाइ पनि तिम्रा ति 

फोटा का चुम्बकहरुले

नतान्ने कुरै भएन

Like मा एक click गरेर

कमेन्ट nice picture लेख्नु    अघि

मलाइ दोहोर्याएर

तिम्रो प्रतिबिम्ब खोज्न मन लाग्यो

तिम्रा  सेता  पिडुला

उच्चा  छाती 

अनि हिस्सी  परेको  अनुहारले

मलाइ नालोभ्याउने  कुरै

Download   गरे

जुम  गरे 

अनि  पटक  पटक  हेरे 

र फेरी एक चोटी

तिमीलाई नंग्याएर

असर्फी ले डामेको

पिडुलाको घाउ

सपनाले चिथोरेर

छिया छिया पारेको कम्मर

बाध्यताले कोतारेर

चिरा चिरा पारेको  छाती

अस्वाशनले दिउसै बलात्कार गरेर

रद्दीको टोकरीमा फालेर

कवाडीको भाउमा

बेचिएको तिम्रो शरीर

हो त्यहि हेर्न मन छ

अब एक पटक

पसिनाको परफ्युम छर्केर

आँसुको गाजल

र रगतको लिपस्टिकले श्रिङ्गारिएर

हिम्मतको क्यामराले

समयको पृष्ठभूमि राखेर

बास्तबिकताको एउटा फोटो खिच

र अपलोड गर

र रंगाउ फेसबुकको वाल

अनि पहिलो लाइक मेरो पाउनेछौ

                                      गजल

मेरो सामु ठाडो शिर झुकाउछिन र चुस्स हेर्छिन

दुवै आँखा परेलीमा लुकाउछिन र चुस्स हेर्छिन

कहिले बिस्तारै हिड्छिन कहिले हिड्छिन बेजोड संग

अलि अलि कोमल पाइला रुकाउछिन र चुस्स हेर्छिन

परै बाट लजाउदै आउछिन जम्का भेट हुदा

छेउमा पुग्दा ओठ मुख सारा सुकाउछिन र चुस्स हेर्छिन

केहि कुरा भन्न खोज्छिन फेरी ओठ टोक्न थाल्छिन

मनको कुरा मनै भित्रै लुकाउछिन र चुस्स हेर्छिन

मेरै बाटो कुरिरहन्छिन पल्लो मोडमा म आइपुग्दा

सारा खुसि ओठ भरि फुकाउछिन र चुस्स हेर्छिन

 गजल

म रोएको बेला हसाउने एउटा मान्छे 

तानेर छेउमै  बसाउने एउटा मान्छे

भेट्नलाई  सधै  हतार गर्ने अनि 

छुट्ने बेला  आँशु  खसाउने एउटा मान्छे

अलि  धेरै दुख अनि थोरै खुशी

सुनाउदा छातीमा टसाउने एउटा मान्छे

नजान्दा नजान्दै मुटुमा डु बाउन 

अलि अलि माया रसाउने एउटा मान्छे

अनि भाग्न खोज्दा मनमै बाँधेर 

नटुट्ने डोरीले कसाउने एउटा मान्छे

लौ है हजुर साह्रै नै खाँचो छ 

दिनेश लाइ प्रेममा फसाउने एउटा मान्छे